កែប៖ ទីលានចាក់សំរាមខេត្តកែប នៃគម្រោងហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាប័ន្នក្នុងមហាអនុតំបន់មេគង្គជំហានទី២ ត្រូវបានដាក់ឱ្យសម្ពោធជាផ្លូវការនាព្រឹកថ្ងៃទី៣០ ខែឧសភា ឆ្នាំ២០២៣ ក្រោមអធិបតីភាព រដ្ឋមន្ត្រីក្រសួងសាធារណការ និងដឹកជញ្ជូន ទេសរដ្ឋមន្ត្រី ស៊ុន ចាន់ថុល។

ទីលានចាក់សំរាមខេត្តកែបសាងសង់ឡើងនៅក្នុងភូមិដំណាក់ចង្អើរ ឃុំព្រៃធំ ក្រុងកែប ក្នុងទំហំដីសរុប១៤ហិកតា។ ទីលានចាក់សំរាមខេត្តកែបនេះសាងសង់មាន៤រណ្តៅដែលអាចមានសមត្ថភាពផ្ទុកសំរាមចំនួន៦សែនម៉ែត្រត្រីគុណ ក្នុងរយៈពេល២០ឆ្នាំ។

ទីលានចាក់សំរាមខេត្តកែប ចំណាយថវិកាសាងសង់ជាង១០លានដុល្លារ ដែលចាប់ផ្តើមសាងសង់នៅថ្ងៃទី១៥ ខែឧសភា ឆ្នាំ២០២០ ហើយរួចរាល់នៅថ្ងៃទី៣១ ខែតុលា ឆ្នាំ២០២២។

អភិបាលខេត្តកែប លោក សោម ពិសិដ្ឋ បានលើកឡើងថា ទីលានចាក់សំរាមខេត្តកែបនេះ គឺជាសមិទ្ធផលដ៏ត្រចេះត្រចង់ ដែលជួយគ្រប់គ្រងសំណល់រឹងក្នុងខេត្តឱ្យមានសោភណ្ឌភាព និងមានសារៈសំខាន់សម្រាប់សុខុមរមនីយកម្ម ខណៈខេត្តកែបគឺជាគោលដៅទេសចរណ៍ដ៏សំខាន់មួយ។

បើតាមលោក សោម ពិសិដ្ឋ ទីលានចាក់សំរាមនេះមិនត្រឹមតែសម្រាប់ប្រើប្រាស់ក្នុងខេត្តកែបប៉ុណ្ណោះទេ តែសម្រាប់ខេត្តដទៃទៀតដែលនៅជាប់ខេត្តកែប។

រដ្ឋមន្ត្រីក្រសួងសាធារណការ និងដឹកជញ្ជូន ទេសរដ្ឋមន្ត្រី ស៊ុន ចាន់ថុល បានលើកឡើងថា ទីលានចាក់សំរាមនេះ គឺជាកន្លែងសម្រាប់គ្រប់គ្រងសំរាមក្នុងខេត្តកែបទាំងមូល និងស្រុកដែលជាប់ខេត្តកែប ដើម្បីធានាបរិស្ថានល្អ និងសុខុមាលភាពប្រជាពលរដ្ឋ។

គូសបញ្ជាក់ថា នៅព្រឹកថ្ងៃទី៣០ ខែឧសភា នេះក្រសួងសាធារណការ និងដឹកជញ្ជូនបានសម្ពោធដាក់ឱ្យប្រើប្រាស់ទីលានចាក់សំរាមក្នុងខេត្តកំពត និងកែបដំណាលគ្នាដោយទីលានចាក់សំរាមទាំងពីរខេត្តនេះសាងសង់ឡើងក្រោមកម្ចីឥណទានសម្បទានរបស់ធនាគារអភិវឌ្ឍន៍អាស៊ីសរុបជាង១៣លានដុល្លារ៕